ലോക പരിസ്ഥിതി ദിനാഘോഷം: ഔദ്യോഗിക ആവശ്യങ്ങൾക്കായി ഇലക്ട്രിക് വാഹനങ്ങൾ വാങ്ങുന്നത് പരിഗണിക്കും — മേയർ
ഗ്രീൻ എനർജി ഫോറത്തിന്റെയും ശ്രീ നാരായണ വനിതാ കോളേജിന്റെയും സംയുക്താഭിമുഖ്യത്തിൽ സംഘടിപ്പിച്ച ലോക പരിസ്ഥിതി ദിനാഘോഷം മേയർ എ കെ ഹഫീസ് ഉദ്ഘാടനം ചെയ്തു.
കോർപ്പറേഷൻ ഓഫീസുകളിൽ സൗരോർജ്ജ പ്ലാൻ്റുകൾ സ്ഥാപിക്കാൻ വേണ്ട നടപടികൾ സ്വീകരിക്കുമെന്നും, ഔദ്യോഗിക ആവശ്യങ്ങൾക്കായി ഇനിമുതൽ ഇലക്ട്രിക് വാഹനങ്ങൾ വാങ്ങുന്നത് പരിഗണക്കുമെന്നും അദ്ദേഹം തന്റെ ഉദ്ഘാടന പ്രസംഗത്തിൽ വ്യക്തമാക്കി.
ചടങ്ങിൽ ഗ്രീൻ എനർജി ഫോറത്തിന്റെ വെബ്സൈറ്റും ഗ്രീൻ എനർജി സ്റ്റുഡന്റസ് മൂവ്മെന്റ് (GEMS) കോളേജ് യൂണിറ്റും മേയർ ഉദ്ഘാടനം ചെയ്തു. കാർബൺ ന്യൂട്രൽ പ്രതിജ്ഞയോടെയാണ് ചടങ്ങുകൾക്ക് തുടക്കമായത്.
ഡിജിറ്റൽ ലോകവും കാർബൺ എമിഷനും (Carbon Emission)
സോഷ്യൽ മീഡിയ ഉപയോഗം നിയന്ത്രിച്ചും ഭക്ഷണ ഉപഭോഗം ക്രമീകരിച്ചും കാർബൺ ന്യൂട്രാലിറ്റി പ്രാവർത്തികമാക്കുന്നതിനെപ്പറ്റി ഗ്രീൻ എനർജി ഫോറം ജനറൽ സെക്രട്ടറി എസ്. രത്നകുമാർ മുഖ്യ പ്രഭാഷണം നടത്തി. സോഷ്യൽ മീഡിയയുടെ ഉപയോഗത്തിൽ ഇന്ത്യയാണ് ലോകത്ത് ഒന്നാം സ്ഥാനത്തുള്ളത്. നിലവിൽ ഇന്ത്യയിൽ 958 മില്യൺ ഇന്റർനെറ്റ് ഉപയോക്താക്കൾ ഉണ്ട്. പ്രതിവർഷം ഇന്റർനെറ്റ് ഉപയോഗം 8 ശതമാനം വീതം വർധിച്ചു വരികയാണ്.
മെറ്റായുടെയും ഗൂഗിളിന്റെയും ഉൾപ്പെടെ ആഗോളതലത്തിലുള്ള 55-ൽ പരം ഡാറ്റ സെന്ററുകളിലാണ് നാം ഉപയോഗിക്കുന്ന സോഷ്യൽ മീഡിയ ഡാറ്റകൾ ശേഖരിച്ചു വയ്ക്കുന്നത്. ഈ വിവരശേഖരണവും ഡിജിറ്റൽ ഇടപാടുകളും വൻതോതിൽ കാർബൺ പുറന്തള്ളലിന് കാരണമാകുന്നുണ്ട്. വരും ദിവസങ്ങളിൽ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയുടെ വളർച്ച കാർബൺ എമിഷൻ വൻതോതിൽ വർധിപ്പിക്കുമെന്നും അദ്ദേഹം ചൂണ്ടിക്കാട്ടി.
ഡിജിറ്റൽ കാർബൺ ഫൂട്ട്പ്രിന്റ് (Digital Carbon Footprint) കണക്കുകൾ:
-
വാട്സാപ്പ് ഫോട്ടോകൾ: വാട്സാപ്പ് വഴി ഒരു ഫോട്ടോ അയക്കുമ്പോൾ 2 മുതൽ 4 ഗ്രാം വരെ കാർബൺ എമിഷൻ ഉണ്ടാകുന്നു.
-
ഇമെയിൽ അറ്റാച്ച്മെന്റുകൾ: ഒരു ഫയൽ (1 MB) അറ്റാച്ച് ചെയ്ത് ഇമെയിൽ അയക്കുമ്പോൾ 19 മുതൽ 24 ഗ്രാം വരെ എമിഷൻ ഉണ്ടാകുന്നു.
-
വീഡിയോ കോളുകൾ: ഒരു മണിക്കൂർ വീഡിയോ കോൾ ചെയ്യുമ്പോൾ 36 ഗ്രാം കാർബൺ എമിഷൻ ഉണ്ടാകുന്നു.
ഭക്ഷണരീതികളും പരിസ്ഥിതി ആഘാതവും
നമ്മുടെ ഭക്ഷണ രീതികളും വൻതോതിൽ കാർബൺ എമിഷന് കാരണമാകുന്നുണ്ടെന്ന് മുഖ്യപ്രഭാഷണത്തിൽ അദ്ദേഹം വ്യക്തമാക്കി. മാംസാഹാര ഉൽപ്പാദനവും വിതരണവും വലിയ തോതിൽ പരിസ്ഥിതി മലിനീകരണത്തിന് കാരണമാകുന്നുണ്ട്.
ഭക്ഷണ പദാർത്ഥങ്ങളുടെ കാർബൺ എമിഷൻ നിരക്ക്:
-
ബീഫ് ബർഗർ: ഒരു ബീഫ് ബർഗർ ഉണ്ടാക്കുന്ന പരിസ്ഥിതി ആഘാതം 7.78 കിലോഗ്രാം കാർബൺ എമിഷനാണ്.
-
ചിക്കൻ ബർഗർ: ഒരു ചിക്കൻ ബർഗർ വഴി 2.5 കിലോഗ്രാം കാർബൺ പുറന്തള്ളപ്പെടുന്നു.
-
സസ്യാഹാരങ്ങൾ: എന്നാൽ സസ്യാഹാരം, ചോറ്, ഗോതമ്പ് വിഭവങ്ങൾ എന്നിവയുടെ ഉപയോഗം വഴി ഏകദേശം 0.2 ഗ്രാം എമിഷൻ മാത്രമേ ഉണ്ടാകുന്നുള്ളൂ.
വിദ്യാർത്ഥി സമൂഹത്തോടുള്ള ആഹ്വാനം
ജീവിതശൈലി ക്രമീകരിച്ചും ഭക്ഷണ രീതിയിലൂടെയും ഒരു പരിധി വരെ കാർബൺ എമിഷൻ കുറയ്ക്കാൻ സാധിക്കും. ആഗോളതാപനം ഉൾപ്പടെയുള്ള വിപത്തുകൾ ഇല്ലാതെയാക്കാൻ വിദ്യാർത്ഥികൾ ആഗോള കൂട്ടായ്മകളിൽ പങ്കാളികളാകണമെന്ന് ചടങ്ങിൽ ആഹ്വാനം ചെയ്തു.
ശ്രീ നാരായണ വനിതാ കോളേജ് പ്രിൻസിപ്പൽ നിഷ വി.എസ്., പ്രൊഫ. പി. ഒ. ജെ. ലബ്ബ, ഡോ. എസ്. രത്നകുമാർ, ഡോ. കെ. മധുസൂദനൻ പിള്ള, ഡോ. എൻ. അനിൽകുമാർ, ഡോ. ഷാൽ ചന്ദ്രൻ, ഡോ. രമ്യ. ആർ എന്നിവർ ചടങ്ങിൽ ആശംസകൾ അർപ്പിച്ചു സംസാരിച്ചു. ഇരുന്നൂറ്റി അമ്പതിൽപ്പരം വിദ്യാർത്ഥിനികളും അധ്യാപകരും ഈ പരിസ്ഥിതി ദിനാഘോഷ ചടങ്ങിൽ പങ്കെടുത്തു.
മീഡിയാ കോ-ഓപ്പറേറ്റീവ് എപ്പോഴും നിങ്ങളോടൊപ്പം. വാർത്തകൾക്കായി വിളിക്കുക: 9387 312196
വാർത്തകളും വിശേഷങ്ങളും അറിയാൻ താഴെ കാണുന്ന whatsapp പബ്ളിക് ചാനൽ ലിങ്ക് ക്ലിക്ക് ചെയ്ത് ഫോളോ ചെയ്യുക :
https://whatsapp.com/channel/0029Vb5EC2CICVfiP901gW2T
