കൊല്ലം: ദക്ഷിണ കേരള ലജ്‌നത്തുൽ മുഅല്ലിമീൻ സംഘടിപ്പിക്കുന്ന കൊല്ലം ജില്ലാതല മദ്റസാ ഫെസ്റ്റ് ‘തനാഫുസ് – 2026’ ഒക്ടോബർ 20 ചൊവ്വാഴ്ച ചാത്തന്നൂർ മുസ്‌ലിം ജമാഅത്ത് അങ്കണത്തിൽ വെച്ച് വിപുലമായ പരിപാടികളോടെ നടക്കും. ജില്ലയിലെ വിവിധ താലൂക്കുകളിലും പ്രദേശങ്ങളിലുമായി വ്യാപിച്ചുകിടക്കുന്ന 12 മേഖലകളിൽ നിന്നായി തിരഞ്ഞെടുക്കപ്പെട്ട 500-ലധികം കലാ-സാഹിത്യ പ്രതിഭകൾ മേളയിൽ അണിനിരക്കും. മത്സരാർത്ഥികളുടെ ബാഹുല്യവും സമയക്രമവും കണക്കിലെടുത്ത് സജ്ജീകരിച്ചിട്ടുള്ള ആറ് പ്രത്യേക വേദികളിലായാണ് മത്സരങ്ങൾ അരങ്ങേറുന്നത്. കലാമേള നടക്കുന്ന ഒക്ടോബർ 20 ചൊവ്വാഴ്ച കൊല്ലം ജില്ലയിലെ മുഴുവൻ മദ്റസകൾക്കും അവധിയായിരിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു.
ചൊവ്വാഴ്ച രാവിലെ നടക്കുന്ന പ്രൗഢഗംഭീരമായ ഉദ്ഘാടന സമ്മേളനത്തോടെ മേളയ്ക്ക് ഔദ്യോഗിക തുടക്കമാകും. ഉദ്ഘാടന സമ്മേളനം അബ്ദുൽ അസീസ് അൽഹാദി നിർവഹിക്കും . മാഹീൻ മന്നാനി ചടങ്ങിൽ അദ്ധ്യക്ഷത വഹിക്കും. വിവിധ വേദികളിലായി ഖുർആൻ പാരായണം, പ്രസംഗം, ഗാനാലാപനം, രചനാ മത്സരങ്ങൾ തുടങ്ങി വിദ്യാർത്ഥികളുടെ സർഗ്ഗാത്മക ശേഷിയും വിജ്ഞാനവും അളക്കുന്ന വൈവിധ്യമാർന്ന ഇനങ്ങളിലാണ് മത്സരങ്ങൾ നടക്കുക. മേഖല തലങ്ങളിൽ നിന്ന് വിജയിച്ചെത്തുന്ന ഏറ്റവും മികച്ച പ്രതിഭകളാണ് ജില്ലാതല വേദികളിൽ പരസ്പരം മാറ്റുരയ്ക്കുന്നത്.
വൈകുന്നേരം നടക്കുന്ന സമാപന സമ്മേളനം ദക്ഷിണ കേരള ജംഇയ്യത്തുൽ ഉലമാ ജനറൽ സെക്രട്ടറി തൊടിയൂർ മുഹമ്മദ് കുഞ്ഞ് മൗലവി ഉദ്ഘാടനം ചെയ്യും. ലജ്‌നത്തുൽ മുഅല്ലിമീൻ ജില്ലാ പ്രസിഡന്റ് അനസ് മുഹമ്മദ് ഇംദാദി സമ്മേളനത്തിൽ അദ്ധ്യക്ഷത വഹിക്കും. സംസ്ഥാന പ്രസിഡന്റ് സയ്യിദ് മുത്തുക്കോയാ തങ്ങൾ ബാഫഖി അനുഗ്രഹപ്രഭാഷണം നിർവ്വഹിക്കും. ലജ്‌നത്തുൽ മുഅല്ലിമീൻ വിദ്യാഭ്യാസ ബോർഡ് ചെയർമാൻ എ.കെ. ഉമർ മൗലവി വിവിധ മത്സരങ്ങളിലെ വിജയികളെയും അവാർഡ് ജേതാക്കളെയും അനുമോദിക്കും.
സമാപന ചടങ്ങിൽ വിദ്യാഭ്യാസ ബോർഡ് സെക്രട്ടറി പാങ്ങോട് എ. ഖമറുദ്ദീൻ മൗലവി മുഖ്യപ്രഭാഷണം നടത്തും. ചാത്തന്നൂർ മുസ്‌ലിം ജമാഅത്ത് പ്രസിഡന്റ് ഷാജഹാൻ സാഹിബ് വിജയികൾക്കുള്ള സമ്മാനദാനം നിർവ്വഹിക്കും. ലജ്‌നത്തുൽ മുഅല്ലിമീൻ ജില്ലാ സെക്രട്ടറി എ.ജെ. സ്വാദിഖ് മൗലവി ചടങ്ങിൽ സ്വാഗതവും, സെക്രട്ടറി നിസാർ മൗലവി ഓയൂർ കൃതജ്ഞതയും രേഖപ്പെടുത്തും. ജില്ലാ മത്സരങ്ങളിൽ ഉന്നത വിജയം കരസ്ഥമാക്കുന്ന പ്രതിഭകളാണ് നവംബർ 20-ന് കോട്ടയം ജില്ലയിലെ കാഞ്ഞിരപ്പള്ളിയിൽ വെച്ച് നടക്കുന്ന സംസ്ഥാനതല തനാഫുസ് മത്സരങ്ങളിൽ കൊല്ലം ജില്ലയെ പ്രതിനിധീകരിച്ച് പങ്കെടുക്കുക.
സ്വാഗതസംഘം ചെയർമാൻ അനസ് മുഹമ്മദ് ഇംദാദി, പാങ്ങോട് എ. ഖമറുദ്ദീൻ മൗലവി, ജനറൽ കൺവീനർ കൊട്ടിയം എ.ജെ. സ്വാദിഖ് മൗലവി, കുണ്ടുമൺ ഹുസൈൻ മന്നാനി, തേവലക്കര ജെ.എം. നാസിറുദ്ദീൻ ഹിഷാമി, പാലുവള്ളി എ. നാസിമുദ്ദീൻ മന്നാനി എന്നിവർ വാർത്താ സമ്മേളനത്തിൽ പങ്കെടുത്തു.
വാർത്തകളും വിശേഷങ്ങളും അറിയാൻ താഴെ കാണുന്ന whatsapp പബ്ളിക് ചാനൽ ലിങ്ക് ക്ലിക്ക് ചെയ്ത് ഫോളോ ചെയ്യുക :
https://whatsapp.com/channel/0029Vb5EC2CICVfiP901gW2T
