ഇംഗ്ലണ്ടിൽ നടക്കുന്ന ക്രിക്കറ്റ് ടൂർണമെന്റായ ദ ഹണ്ട്രഡ് 2026 സീസണിനായുള്ള ആദ്യത്തെ പ്ലെയർ ലേലം പൂർത്തിയായതോടെ എല്ലാ എട്ട് ടീമുകളുടെയും സ്ക്വാഡുകൾ രൂപം കൊണ്ടു. ഇതാദ്യമായാണ് ടൂർണമെന്റിൽ ഡ്രാഫ്റ്റ് സംവിധാനത്തിന് പകരം ഐപിഎൽ മാതൃകയിൽ പ്ലെയർ ലേലം നടപ്പാക്കുന്നത്. ലണ്ടനിൽ നടന്ന ലേലത്തിൽ ഇംഗ്ലണ്ടിന്റെ യുവ ഓൾറൗണ്ടർ ജെയിംസ് കോൾസ് ലണ്ടൻ സ്പിരിറ്റിലേക്ക് £390,000 ന് ചേർന്നതോടെ ഏറ്റവും വിലയേറിയ താരമായി മാറി. ജോർദാൻ കോക്സ് വെൽഷ് ഫയറിലേക്ക് £300,000ക്കും, ടോം കറൻ MI ലണ്ടനിലേക്ക് £260,000ക്കും, ആദിൽ റഷീദ് സൗതേൺ ബ്രേവിലേക്ക് £250,000ക്കും കരാറായി.
പാകിസ്ഥാൻ സ്പിന്നർ അബ്രാർ അഹമ്മദ് £190,000ക്ക് സൺറൈസേഴ്സ് ലീഡ്സിൽ ചേർന്നതും ശ്രദ്ധേയമായി. ബർമിംഗ്ഹാം ഫീനിക്സ്, ട്രെന്റ് റോക്കറ്റ്സ്, വെൽഷ് ഫയർ, സൗതേൺ ബ്രേവ്, ലണ്ടൻ സ്പിരിറ്റ്, എംഐ ലണ്ടൻ, മാഞ്ചസ്റ്റർ ഓറിജിനൽസ്, സൺറൈസേഴ്സ് ലീഡ്സ് എന്നീ എട്ട് ടീമുകളാണ് ടൂർണമെന്റിൽ മത്സരിക്കുന്നത്. ജൂലൈ 21 മുതൽ ഓഗസ്റ്റ് 16 വരെ ഇംഗ്ലണ്ടിൽ മത്സരം നടക്കും.
