ബംഗാളിലെ തെരഞ്ഞെടുപ്പ് പ്രക്രിയ അട്ടിമറിക്കാൻ കേന്ദ്ര ആഭ്യന്തര മന്ത്രി അമിത് ഷാ എൻഫോഴ്സ്മെന്റ് ഡയറക്ടറേറ്റിനെ ഉപയോഗിച്ചുവെന്ന ആരോപണവുമായി പശ്ചിമ ബംഗാൾ മുഖ്യമന്ത്രി മമത ബാനർജി രംഗത്തെത്തി. കേന്ദ്ര ഏജൻസികളെ രാഷ്ട്രീയ ആയുധങ്ങളാക്കുകയാണെന്നും, തൃണമൂൽ കോൺഗ്രസ് നേതാക്കളെ ലക്ഷ്യമിട്ടുള്ള അന്വേഷണങ്ങൾ തെരഞ്ഞെടുപ്പ് അടുത്തിരിക്കെ വർധിപ്പിക്കുന്നത് യാദൃശ്ചികമല്ലെന്നുമാണ് മമതയുടെ ആരോപണം. മറുപടിയായി, നിയമത്തിന് മുന്നിൽ എല്ലാവരും ഒരുപോലെയാണെന്ന് വ്യക്തമാക്കി ഭാരതീയ ജനതാ പാർട്ടി രംഗത്തെത്തി. അഴിമതിക്കെതിരായ നടപടികളെയാണ് തൃണമൂൽ രാഷ്ട്രീയവത്കരിക്കുന്നതെന്ന് ബിജെപി പ്രതികരിച്ചു. ഇതോടെ ബംഗാളിൽ വീണ്ടും തൃണമൂൽ–ബിജെപി രാഷ്ട്രീയ പോര് ശക്തമായിരിക്കുകയാണ്.
