വെള്ളിമൺ മിനിമോൾ മെമ്മോറിയൽ സ്വാന്ത്വനം ചാരിറ്റബിൾ ട്രസ്റ്റിന്റെ നേതൃത്വത്തിൽ സൗജന്യ നേത്ര ചികിത്സാ ക്യാമ്പ് സംഘടിപ്പിച്ചു; എഡിഎം നിർമ്മൽ കുമാർ ഉദ്ഘാടനം ചെയ്തു
കുണ്ടറ: കാരുണ്യ പ്രവർത്തനങ്ങളിൽ മാതൃകയായി കുണ്ടറ കേന്ദ്രമായി പ്രവർത്തിക്കുന്ന വെള്ളിമൺ മിനിമോൾ മെമ്മോറിയൽ സ്വാന്ത്വനം ചാരിറ്റബിൾ ട്രസ്റ്റും പ്രശസ്തമായ തിരുനെൽവേലി അരവിന്ദ് കണ്ണാശുപത്രിയും സംയുക്തമായി സൗജന്യ നേത്ര ചികിത്സാ ക്യാമ്പ് സംഘടിപ്പിച്ചു.
വെള്ളിമൺ വൊക്കേഷണൽ ഹയർസെക്കൻഡറി സ്കൂളിൽ വെച്ച് നടന്ന ക്യാമ്പിന്റെ ഔദ്യോഗിക ഉദ്ഘാടനം എഡിഎം നിർമ്മൽ കുമാർ. ജി നിർവ്വഹിച്ചു.
ചടങ്ങിൽ സ്വാന്ത്വനം ചാരിറ്റബിൾ ട്രസ്റ്റ് പ്രസിഡന്റ് ജി. സോമശേഖരൻ പിള്ള അധ്യക്ഷത വഹിച്ചു. സെക്രട്ടറി റോയി കുമാർ സ്വാഗതം ആശംസിച്ചു.
ഡോക്ടർ സുമിത്ര നായർ, സന്ദീപ്, വെള്ളിമൺ സന്തോഷ്, സനിൽ, സന്തോഷ് തുടങ്ങിയ പ്രമുഖർ ചടങ്ങിൽ ആശംസകൾ അർപ്പിച്ചു സംസാരിച്ചു. സാംസ്കാരിക പ്രവർത്തകനായ ബി. കുഞ്ഞുമോൻ ചടങ്ങിന് നന്ദി രേഖപ്പെടുത്തി.
300 ഓളം പേർ പങ്കെടുത്തു; 48 പേർക്ക് സൗജന്യ ശസ്ത്രക്രിയ
ഇന്ന് രാവിലെ 8 മണിക്ക് ആരംഭിച്ച ക്യാമ്പ് ഉച്ചതിരിഞ്ഞ് 3 മണി വരെ നീണ്ടുനിന്നു. കൺസൾട്ടേഷൻ, കാഴ്ച പരിശോധന എന്നിവ ഉൾപ്പെടെ വിപുലമായ സൌകര്യങ്ങളാണ് ക്യാമ്പിൽ ഒരുക്കിയിരുന്നത്.
തിരുനെൽവേലി അരവിന്ദ് കണ്ണാശുപത്രിയിൽ നിന്നുള്ള 5 വിദഗ്ദ്ധ ഡോക്ടർമാരും 25 ഓളം ആരോഗ്യ പ്രവർത്തകരും അടങ്ങുന്ന സംഘമാണ് രോഗികളെ പരിശോധിച്ചത്.
നാട്ടുകാരും പരിസരവാസികളുമായ 300 ഓളം പേർ ക്യാമ്പിന്റെ പ്രയോജനം പ്രയോജനപ്പെടുത്തി. ഇതിൽ വിദഗ്ദ്ധ പരിശോധനയ്ക്ക് ശേഷം അടിയന്തരമായി തിമിര ശസ്ത്രക്രിയ ഉൾപ്പെടെയുള്ളവ ആവശ്യമായി വന്ന 48 പേരെ പ്രത്യേകം തിരഞ്ഞെടുക്കുകയുണ്ടായി.
ഇവർക്കുള്ള തുടർന്നുള്ള ശസ്ത്രക്രിയാ സഹായങ്ങൾ ട്രസ്റ്റിന്റെയും ആശുപത്രിയുടെയും നേതൃത്വത്തിൽ ലഭ്യമാക്കും. ക്യാമ്പിൽ പങ്കെടുത്ത മുഴുവൻ രോഗികൾക്കും ജീവനക്കാർക്കും ആവശ്യമായ ഭക്ഷണ സൗകര്യവും ട്രസ്റ്റ് ഭാരവാഹികൾ ഒരുക്കിയിരുന്നു.
കാരുണ്യത്തിന്റെ സ്വാന്ത്വനം: വർഷങ്ങളായി തുടരുന്ന ജീവകാരുണ്യ പ്രവർത്തനങ്ങൾ
കുണ്ടറയിലും പരിസര പ്രദേശങ്ങളിലും വർഷങ്ങളായി വിപുലമായ രീതിയിലുള്ള ജീവകാരുണ്യ പ്രവർത്തനങ്ങളാണ് വെള്ളിമൺ മിനിമോൾ മെമ്മോറിയൽ സ്വാന്ത്വനം ചാരിറ്റബിൾ ട്രസ്റ്റ് നടത്തിവരുന്നത്.
ആംബുലൻസ് സർവീസും കിടപ്പുരോഗികൾക്കുള്ള സഹായങ്ങളും
അടിയന്തര ഘട്ടങ്ങളിൽ സാധാരണക്കാർക്ക് വലിയ ആശ്വാസമേകുന്ന സൗജന്യ ആംബുലൻസ് സർവീസ് ഉൾപ്പെടെയുള്ള സഹായങ്ങൾ ട്രസ്റ്റ് പൊതുജനങ്ങൾക്കായി നൽകി വരുന്നുണ്ട്.
കൂടാതെ ദീർഘകാലമായി കിടപ്പിലായ രോഗികൾക്ക് വേണ്ടിയുള്ള പ്രത്യേക ചികിത്സാ സഹായങ്ങൾ, മരുന്നുകൾ, നിർധന കുടുംബങ്ങൾക്കുള്ള സാമ്പത്തിക സഹായങ്ങൾ എന്നിവയും ട്രസ്റ്റിന്റെ ആഭിമുഖ്യത്തിൽ നിരന്തരമായി എത്തിക്കുന്നു.
മാതൃകാപരമായ രക്തദാന ക്യാമ്പുകളും പഠനോപകരണ വിതരണവും
ട്രസ്റ്റിന്റെ പ്രവർത്തനങ്ങളിൽ ഏറ്റവും എടുത്തുപറയേണ്ട ഒന്നാണ് ഇവരുടെ നേതൃത്വത്തിൽ നടന്നു വരുന്ന രക്തദാന പ്രവർത്തനങ്ങൾ. ദിനംപ്രതി നിരവധി ആളുകളാണ് സ്വാന്ത്വനം ട്രസ്റ്റിന്റെ ഡാറ്റാ ബാങ്ക് വഴി വിവിധ ആശുപത്രികളിലേക്ക് രക്തദാതാക്കളായി മുന്നോട്ട് വരുന്നത്.
ഇതിനുപുറമേ, ഓരോ അധ്യയന വർഷത്തിന്റെ തുടക്കത്തിലും സ്കൂൾ വിദ്യാർത്ഥികൾക്കായുള്ള സൗജന്യ പഠനോപകരണ വിതരണവും ട്രസ്റ്റ് മുടക്കം കൂടാതെ നടത്തിവരുന്നു.
പ്രിയപ്പെട്ടവളുടെ ഓർമ്മയ്ക്കായി ഒരു കാരുണ്യ പ്രസ്ഥാനം
സർവീസിൽ ഇരിക്കുന്ന സമയത്ത് അർബുദ (ക്യാൻസർ) ബാധയെ തുടർന്ന് അകാലത്തിൽ മരണപ്പെട്ട മിനിമോളുടെ ഓർമ്മ നിലനിർത്തുന്നതിനായിട്ടാണ് ഈ ജീവകാരുണ്യ പ്രസ്ഥാനം രൂപീകരിക്കപ്പെട്ടത്. മിനിമോളുടെ ഭർത്താവായ സെബാസ്റ്റ്യനാണ് ഭാര്യയോടുള്ള സ്നേഹത്തിന്റെയും ഓർമ്മയുടെയും പ്രതീകമായി ‘മിനിമോൾ സ്വാന്ത്വനം ചാരിറ്റബിൾ ട്രസ്റ്റ്’ എന്ന പ്രസ്ഥാനത്തിന് രൂപം നൽകിയത്. ഇന്ന് കുണ്ടറയിലെയും കൊല്ലം ജില്ലയിലെയും നിരവധി പാവപ്പെട്ട ജനങ്ങൾക്ക് വലിയൊരു സ്വാന്ത്വനമായി ഈ സംഘടന മാറി കഴിഞ്ഞിരിക്കുന്നു.
