വരാനിരിക്കുന്ന നിയമസഭാ തിരഞ്ഞെടുപ്പിൽ രണ്ട് മണ്ഡലങ്ങളിൽ മത്സരിക്കാൻ വിജയ് തയ്യാറെടുക്കുന്നതായി രാഷ്ട്രീയ വൃത്തങ്ങൾ സൂചിപ്പിക്കുന്നു. ശ്രദ്ധേയമായ കാര്യം, അദ്ദേഹം പരിഗണിക്കുന്ന മണ്ഡലങ്ങൾ എല്ലാം ‘വി’ എന്ന അക്ഷരത്തിൽ തുടങ്ങുന്നവയാണെന്നതാണ്. രാഷ്ട്രീയ പ്രവേശനത്തിന് ശേഷം ശക്തമായ പൊതുസമ്മേളനങ്ങളും സാമൂഹിക ഇടപെടലുകളും വഴി ജനപിന്തുണ വർധിപ്പിച്ച വിജയ്, തന്ത്രപരമായ നീക്കങ്ങളിലൂടെയാണ് തിരഞ്ഞെടുപ്പ് രംഗത്തേക്ക് കടക്കുന്നത്. പാർട്ടിയുടെ ആഭ്യന്തര വിലയിരുത്തലുകളും സർവേ റിപ്പോർട്ടുകളും അടിസ്ഥാനമാക്കിയാണ് മണ്ഡല തിരഞ്ഞെടുപ്പ് നടക്കുന്നതെന്ന് അറിയുന്നു. രണ്ട് മണ്ഡലങ്ങളിൽ മത്സരിക്കുന്നത് വിജയസാധ്യത വർധിപ്പിക്കാനുളള ശ്രമമാണെന്നാണ് വിലയിരുത്തൽ. ഇതോടെ, തമിഴ്നാട് രാഷ്ട്രീയത്തിൽ പുതിയ മാറ്റങ്ങൾ ഉണ്ടാകുമെന്ന പ്രതീക്ഷ ശക്തമാകുകയാണ്. ഔദ്യോഗിക പ്രഖ്യാപനം ഉടൻ ഉണ്ടാകുമെന്ന സൂചനകളും പുറത്തുവരുന്നുണ്ട്.
