995 ലെ ട്രെയിനിലെ വെടിവെയ്പ് കേസിലും മോന്സണ് മാവുങ്കല് കേസിലും തന്നെ പ്രതിസ്ഥാനത്ത് നിര്ത്താനാണ് സര്ക്കാരും ആഭ്യന്തരവകുപ്പും ശ്രമിക്കുന്നതെന്ന് കെപിസിസി പ്രസിഡന്റ് കെ.സുധാകരന്. തെളിവില്ലാത്ത കേസുകളില് തന്നെ പ്രതിയാക്കാന് സര്ക്കാര് കാട്ടുന്ന ഉത്സാഹം പ്രശംസനീയമാണ്. രാഷ്ട്രീയത്തെ രാഷ്ട്രീയം കൊണ്ടുനേരിടുന്നതാണ് ജനാധിപത്യത്തിന്റെ ശൈലി. മറിച്ച് ഗൂഡാലോചന നടത്തിയും വളഞ്ഞ വഴിയിലൂടെയും വേട്ടയാടാന് ശ്രമിക്കുന്നത് ഭീരുത്വമാണെന്നും കെ സുധാകരന് പറഞ്ഞു.
കഴിവും പ്രാപ്തിയുമുള്ള മന്ത്രിമാര് കുറവെന്ന് പരസ്യമായി സമ്മതിക്കേണ്ട ഗതികെട്ട മുഖ്യമന്ത്രി, തനിക്കെതിരായ രാഷ്ട്രീയ പ്രതികാര നടപടിയെ തികഞ്ഞ അവജ്ഞയോടെ തള്ളിക്കളയുന്നുവെന്നും കെ.സുധാകരന് പറഞ്ഞു.ഭരണഘടനയെ ബഹുമാനിക്കാത്ത,രാജ്യത്തിന്റെ ആത്മാഭിമാനത്തെ ചോദ്യം ചെയ്യുന്ന ജനപ്രതിനിധികളുടെ കൂടാരമാണ് എല്ഡിഎഫ്. ദേശവിരുദ്ധ പരാമര്ശം നടത്തിയ കെടി ജെലീലിനെ സിപിഐഎമ്മും മുഖ്യമന്ത്രിയും സംരക്ഷിക്കുകയാണ്.
രാഷ്ട്രീയ വൈര്യത്തിന്റെ പേരില് കോണ്ഗ്രസ് നേതാക്കള്ക്കെതിരെ നിയമനടപടിയുമായി മുന്നോട്ട് പോകാന് താത്പ്പര്യം കാട്ടുന്ന ആഭ്യന്തരവകുപ്പ് എന്തുകൊണ്ടാണ് എല്ഡിഎഫ് നേതാക്കള്ക്കെതിരായ കേസ് അന്വേഷണത്തില് അലംഭാവം കാണിക്കുന്നത്. വിമാനത്തില് യൂത്ത് കോണ്ഗ്രസ് പ്രവര്ത്തകരെ അക്രമിച്ച എല്ഡിഎഫ് കണ്വീനര്ക്കെതിരെ കേസെടുക്കാന് കോടതി നിര്ദ്ദേശിച്ചിട്ടും അതിന് ആഭ്യന്തരവകുപ്പിന് ഒട്ടും താല്പ്പര്യമില്ല.എകെജി സെന്ററിലെ പടക്കമേറുമായി ബന്ധപ്പെട്ട അന്വേഷണം ശരിയായ ദിശയില് പോയാല് എല്ഡിഎഫ് കണ്വീനര് ജയിലില് കിടക്കുമെന്ന് സിപിഎമ്മിനും കേരള സര്ക്കാരിനും ഉത്തമബോധ്യമുള്ളത് കൊണ്ടാണ് ആ കേസിലെ പ്രതി ഇപ്പോഴും കാണാമറയത്ത് നില്ക്കുന്നതെന്നും സുധാകരന് പരിഹസിച്ചു.
